Asparez

Անօթեւաններն իրենց «դոմիկներն» են հրավիրում Գյումրու քաղաքապետին եւ ավագանու անդամներին

info — Tue, 21 May 2013 11:01:27 +0000

Ֆոտոռեպորտաժ

«Էկեք՝ տեսեք մեր վիճակը»

Գյումրու կենտրոնում գտնվող եւ բացարձակ անտարբերության մատնված տնակային այս թաղամասը Ավտոկայանն է: Ամենածանր պայմաններում ապրող անօթեւաններ, անբարեկարգ փողոցներ ու աղբակույտերով, առնետներով, գորտերով շրջապատված կիսավեր տնակներ. համայնքային իշխանությունների աչքերից խուփ՝ այստեղ շարունակում են ապրել ու գոյատեւել հարյուրավոր անապահով ընտանիքներ:

Ավտոկայանի բնակիչները քաղաքապետարանի ղեկավարներին՝ հրապարակը եղեւնիներից ազատելու փոխարեն, խնդրում են իրենց ազատել այս պայմաններից:

«Էկեք՝ տեսեք մեր վիճակը, մե հատըմ էկեք, էլի, տեսեք՝ ի՞նչ կկատարվի, ըբը էս հասարակ բաները՝ զիբլը, փողոցները, ով գուքա` իրա աչքի առաջը պուպուշ-լամիշ կենէ»,-Գյումրու ավագանու ադամներին ու քաղաքապետին է դիմում տարեց բնակիչներից մեկը:

Անի Մկրտչյան

Սերտ ընտանեկան կապերը նվազեցնում են ինքնասպանության հավանականությունը

info — Tue, 21 May 2013 10:07:16 +0000

Պատասխանում է հոգեբան Վարդան Պապիկյանը

Հարցը՝ «Գյումրի-Ասպարեզ» օրաթերթի ընթերցողից:

-Հարգելի հոգեբան, ի՞նչ կարող եք ասել ինքնասպանության կանխարգելման մասին:

-Հոգեկանի խանգարման վաղաժամ հայտնաբերումը եւ համապատասխան շտկումը կանխարգելման հիմնական մասն են կազմում: Ինքնասպանության հոգեշտկման եւ կանխարգելման հիմնական չափանիշներն են անձի հակասուիցիդալ գործոնների ձեւավորումը, որոնք հետագայում կխոչընդոտեն սուիցիդալ վարքի դրսեւորումները: Հակասուիցիդալ գործոններից են` չիրագործված ստեղծագործական պլանները, ինքնասպանության անիմաստության գիտակցումը, հարազատներին հոգեկան ցավ պատճառելու վախը, մահվան եւ սպանության հիմնախնդրի հետ կապված կրոնական եւ սոցիալական տաբուն: Սերտ ընտանեկան եւ սոցիալական կապերը նվազեցնում են ինքնասպանության հավանականությունը:

Պետք է հիշել, որ քրիստոնեական եկեղեցին դատապարտում է ինքնասպանությունը: Այն համարվում է մեծագույն մեղքերից մեկը: Ինքնասպանը կրկնակի մեղք է գործում` սպանություն եւ թերահավատություն Աստծո հանդեպ: Ինքնասպանությունն աստվածամերժություն է: Աստված է պարգեւում կյանքը, եւ մարդն իրավունք չունի խլել այն: Ինքնասպանություն գործածը զրկվում է հոգեհանգստյան արարողությամբ թաղում կատարելուց: Սակայն, որքանով տեղյակ եմ, բացառություն է հանդիսանում խելագարությունը, երբ ինքնասպանությունը կատարվել է բանականության մթագնման վիճակում: Իսկ եթե մեկն իրեն կյանքից զրկելով, նպատակ ունի փրկել այլոց, այս դեպքում արարքը դիտվում է որպես ինքնազոհաբերություն: Հիշենք Վարդանանց պատերազմը. «Մահ չիմացեալ մահ է, մահ իմացեալ` անմահություն»:

Հարցեր ունենալու դեպքում դրանք կարող եք ուղղել մեր հոգեբանին՝ հետեւյալ էլեկտրոնային հասցեով՝ hakobyanalis@gmail.com: Եթե անգամ խնդրի լուծումն ամբողջությամբ չստանաք, ապա ճիշտ որոշում ընդունելու ուղին, ամեն դեպքում կմատնանշվի:

Պատրաստեց Ալիսա Հակոբյանը

________________________________

Բաժանորդագրություն.

Հարգելի ընթերցող, առաջարկում ենք բաժանորդագրվել «Գյումրի-Ասպարեզ» օրաթերթի թղթե տարբերակը: Այս կայքում հրապարակվում է թերթում լույս տեսած հոդվածների մի մասը միայն: Բաժանորդագրվելիս դուք կտնտեսեք էական գումար: Այսպես. թերթն ամեն օր գնելիս տարեկան ծախսելու եք 25.700 դրամ, իսկ տարեկան բաժանորդագրման դեպքում` ընդամենը 16.000 դրամ: Բաժանորդագրությունն իրականացվում է նաեւ 6 ամսով, 3 եւ 1 ամսով: Բաժանորդագրությունն իրականացվում է առայժմ միայն Գյումրիում:

Բաժանորդագրության առավելությունն այն է, որ անկախ տարվա եղանակից եւ ձեր զբաղվածությունից, դուք ամեն օր ժամը 9-12-ի միջակայքում, պայմանագրում ձեր նշած հասցեում կստանաք թերթը: 8 ամսվա ընթացքում մեր բաժանորդագիրներից որեւէ մեկին թերթը ոչ մի անգամ ուշ չի հասցվել:

Եթե կկամենաք բաժանորդագրվել, պարզապես զանգահարեք (0312) 50622, ձեզ կայցելի գործակալը:

«Ի՞նչ, որտե՞ղ, ե՞րբ»-ի բարձրագույն լիգայի գարնանային առաջնություն

info — Mon, 20 May 2013 14:36:18 +0000

Մայիսի 19-ին Գյումրու Ֆոտոն վարժարանում տեղի ունեցավ «Ի՞նչ, որտե՞ղ, ե՞րբ» ինտելեկտուալ խաղի բարձրագույն լիգայի գարնանային առաջնությունը: Առաջնությունը կազմակերպել էր «ԽորանԱրդ» ինտելեկտուալ կենտրոնը: Առաջնությանը մասնակցում էին 11 թիմ, որից 5-ը՝ «Սենատորներ», «ԽորանԱրդ», «Աստղեր», «ՊոլիՏեխ» եւ «Ֆավորիտ», մրցութային կարգով, իսկ մնացած 6-ը՝ առաջին եւ պատանեկան գարնանային լիգաների ընթացքում լավագույն տեղերը զբաղեցրած թիմերը՝ «Գենտ», «Անի», «Կաիսա»,«Ֆոտոն», «Նեմրութ» եւ «Ֆորտունա», մասնակցում էին մրցույթից դուրս :

«Ի՞նչ, որտե՞ղ, ե՞րբ»-ի երեք փուլի ընթացքում հնչեց 36 հարց, 24 հարց՝ հայերենով եւ 12 հարց՝ ռուսերենով:

Բարձրագույն լիգայի մրցությունում առաջին տեղը գրավեց «ՊոլիՏեխ» թիմը, երկրորդ եւ երրորդ տեղերը զբաղեցրին «ԽորանԱրդ» եւ «Սենատորներ» թիմերը: «Ֆոտոն» վարժարանի սաները զբաղեցրեցին չորրորդ տեղը:

Բացի «Ի՞նչ, որտե՞ղ, ե՞րբ՚-ի մրցաշարից, առաջնությունն ընդգրկում էր նաեւ «Սեփական խաղ» եւ «Բրեյն ռինգ» խաղերի մրցաշարեր: Բարձրագույն լիգայի թիմերից առաջին ութ տեղերը զբաղեցրած թիմերը հնարավորություն ունեցան մասնակցելու եւ իրենց պայքարը շարունակելու «Բրեյն ռինգ»-ի մրցաշարում: Այստեղ առաջին տեղը գրավեց «ՊոլիՏեխ» թիմը, երկրորդ եւ երրորդ տեղերը զբաղեցրեցին համապատասխանաբար «ԽորանԱրդ» եւ «Ֆոտոն» թիմերը: «Բրեյն ռինգ»-ից հետո 3 թիմերից 4-ական հոգի (էրուդիտ կվարտետ) մասնակցեց «Սեփական խաղ» մրցույթին, որտեղ լավագույն թիմ ճանաչվեց «ՊոլիՏեխ» թիմը:

Ժողովրդի գլխին կեղտոտ խաղ խաղացին

info — Mon, 20 May 2013 14:27:33 +0000

Գազի գնի հնարավոր թանկացման եւ դրա հետեւանքների վերաբերյալ հարցախույզ անցկացրինք գյումրեցիների շրջանում: Մեր համաքաղաքացիներից ոմանք մեզ հետ զրույցում նշեցին, որ գազի գների բարձրացման պարագայում Հայաստանից արտագաղթը ավելի մեծ չափերի կհասնի՝ կառավարության քաղաքականությունը սեփական ժողովրդի հանդեպ որակելով, որպես լկտի եւ ապաշնորհ քաղաքականություն, որը նպատակաուղղված է Հայաստանը հայաթափելուն:

Տիկին Ժենյա. «Ինչ ուզենան, էն էլ կենեն: Որ բողոքեցինք, ի՞նչ պիտի էնենք, էլի նույնն է լինելու: Իսկ թե ընչի նախագահական ընտրությունների ժամանակ գազի գնի թանկացման հարցը չբարձացվեց, սաղս էլ էդ հարցի պատասխանը գիտենք»:

Տիկին Արմինե, վաճառողուհի.«Էս ձմեռ մենք գազ չենք վառելու, այլ կարդոն: Խանութներից կհավաքեն, կտանենք, կվառենք, փառք Աստծո»:

Վաճառողուհի.«Ժողովրդին ամեն կողմից կճնշեն, ի՞նչ կռնա էնել: Ժողովուրդը սորվել է, ինչ էլ էնեն, համբերությամբ կտանի, բայց մէ օրմ էդ համբերության բաժակը կլցվի: Ես կզարմանամ, որ Վրաստանը գազն էժանացնում է, մեր մոտ թանականում, էս ինչ լկտի կառավարություն է»:

Գյումրու պետական մանկավարժական ինստիտուտի ուսանողուհի.«Գազի գնի թանկացման հետեւանքով Էն մասը, որ կարող է հեռանալ, կհեռանա Հայաստանից, իսկ ժողովրդի այն հատվածը, որ անվճարունակ է, ստիպված է դիմանալ այս պայմաններին: Հաշվի առնելով, որ Գյումրիում 6 ամիս է ձմռան տեւողությունը, Շիրակի մարզում գազն այլ գնով պետք է տային, իսկ Երեւանում ամբողջ հանրապետության գումարներն են շրջանառվում»:

Վարդեւան Գրիգորյան, Գյումրու պետական մանկավարժական ինստիտուտի ռեկտոր.«Գազի գնի թանկացումը միայն մեր կառավարության խնդիրը չէ, քանի որ գազը տալիս է Ռուսաստանը: Իհարկե, գուցե որոշակի պայմանավորվածության արդյունքում է թանկացել: Ռուսաստանը լինելով մեզ ռազմավարական ընկեր՝ իր տնտեսական շահն ունի: Իհարկե, եթե համեմատում ենք եվրոպական գների հետ, այնտեղ ավելի թանկ են տալիս: Կառավարությունը կմշակի այնպիսի ծրագիր, որ գազի գների թանկացումը մեր ժողովրդի վրա լուրջ ազդեցություն չունենա: Կարծում եմ՝ կամ աշխատավարձի կամ սուբսիդավորման տեսքով ինչ-որ բան կլինի: Չեմ կարծում, որ կառավարությունն էս ժողովրդի թշնամին է, էդպե՞ս մտածենք ուրեմն: Չեմ մտածում այդպես, որովհետեւ կառավարության ամեն մի անդամ առաջին հերթին հայ է»:

Ալվինա Մարգարյան, 75 տարեկան.«Վա՛յ ազիզ ջան, 58 կապրիմ: Մենակ տեսնիս, առավոտները ժամը 7-ին ինչ ժողովուրդ կերթա: 4-5 տեղով, էրեխեքով, բալուլով: Ընչի՞ պտի ես իմ ծերությունս փողոցներն անցնեի: Էդ խուժան-խուլիգանը, ուրտից էլ բերեցին դրան, երեսը պադոշ ինչխոր էղնի: Ընչի է կպե, մնացե աթոռին, երեսն ամերիկական պադոշ է, ոչ կհալի, ոչ կմաշի: Հմի գազ կվառենք, բայց որ չկարողացանք, ստիպված փայտ ենք առնելու»:

Քնքուշ Հարությունյան, 70 տարեկան.«Բայց ինչո՞վ պետք է փակեմ գազի վարձը: Թոշակ եմ ստանում, տունն աշխատող ձեռք չունիմ: Թոշակով գազը փակեմ, տան վարձը, ամեն ինչը…: Կխնդրեմ ղեկավարությանը կարգավորել էս հարցը»:

Մալվինա եւ Ժաննա Հովհաննիսյաններ, քույրեր. «Կառավարությունն էնպես արեց, որ մենք շնորհակալություն հայտնենք գազի 30 տոկոս թանկացման համար: Եթե գազին փոխարինենք լույսը, էլի թանկ է, իսկ գազից հետո չենք ուզում նորից փայտի անցնել: Էս լուսավոր աշխարհում անլույս նստել, դաժան կլինի: Ցանկության դեպքում կառավարությունը ամեն ինչ էլ կարող է, իրանց ձեռքերը կապած չէր, որ մերժեին գազի գնի բարձրացման մասին հայտը: Կառավարության լկտի քայլն էր, որ ժողովուրդն լիներ շնորհակալ լիներ 30 տոկոս գնի բարձրացման համար: Ժողովրդի գլխին կեղտոտ խաղ խաղացին: Հիմա ի՞նչ, դրա համար շնորհակալությու՞ն հայտնենք: Ուրիշ երկրներ 1-2 տոկոս թանկացումների դեպքում հսկայական հացադուլներ կենեն, աշխատանքի չեն էրտա: Ստեղ բունտ էնել, պայքարել չկա: Մեր քաղաքում էլ պետք է պայքար լինի, ոչ թե յուրաքանչյուրն իր կարծիքը համացանցում գրեր եւ վերջ: Պետք էր Լեւոն Բարսեղյանի, Ալեն Սիմոնյանի, Նիկոլ Փաշինյանի նման մարդիկ: Պետք է կազմակերպող լինի»:

Արտակ Հովհաննիսյան, պատմաբան.«Մեր էլեկտրաէներգիայի արտադրությունն ամբողջությամբ չէ, որ գազից է կախված, բայց հոգեբանական առումով ընդհանուր թանկացման միտում է նկատվում: Դա շուկայական հարաբերություններում գիշատչի վերաբերմունքի դրսեւորում է, երբ դեռ չկա ինչ-որ բան, բայց դրա հետ կապված գործընթացներ են տեղի ունենում: Կարող է լինել նաեւ գազի ծավալների սպառման անկում: Սոցիալական ճգնաժամը չի մեղմացվելու, ընդհանուր թանկացման չափաբաժինը շատ մեծ է լինելու: Սա, կարելի է ասել, մարտահրավեր է մեր պետությանը ռազմավարական դաշնակցի կողմից: Մենք չենք կարող մեղադրել մի կողմին, որն իր ապրանքը որոշել է վաճառել ինչ-որ գնով: Չի կարող մի ապանքը մի երկրին տալ իքս գումարով, մյուս երկրին՝ հինգ իքս գումարով: Պետք է լինի ընդհանուր նվազագույն մինիմում շեմ: Եթե մենք ի վիճակի չենք սպառված գազի դինաց վճարել, մնում է հարցը տեղափոխել քաղաքական հարթություն, այսինքն ռազմավարական դաշնակցին ոչ վայել պահվածք: Դա էներգետիկ մահակ է եւ Ռուսաստանը միայն մեր դեմ չի կիրառում այն, էստեղ քաղաքական խնդիրներ էլ կան»:

Լիլիթ Շառոյան. «Գազի գների թանկացմամբ ամեն ինչ կթանկանա: Էն, որ մեր կառավարությունը թքած ունի էս երեւույթի վրա, դա պարզ է: Մենք չենք փորձում էդ կարծրատիպը կոտրել: Գոնե վախ ունենան, որ մարդիկ կբողոքեն: Ոնց որ ժողովրդի նոր ջարդ տեղի ունենա»:

Գառնիկ պապ, հագուստեղենի շուկայի վաճառող. «Գուզես ստեղ մէ 10 րոպե քայլե, մարդ չի մտնի: Գազն էլ թանկանալու է, քաղաք մարդ չի մնացել, սաղ գնացել են, սաղ գուլան»:

Գեւորգ Չախմախչյան, Գյումրու Սայաթ-Նովա փողոցի բնակիչ.«Գազի գների թանակցումով ամենավատ բաներն էլ կարելի է սպասել: 30 տոկոսն իրանք բդի տան, բայց ի՞նչ կենե, ձեռ են առնում: Էն աստիճանի է հասել, որ մարդիկ իրանց-իրանց խոսելով կերտան: Էս Լեննագանը խելռել է սավսեմ: Էս ժողովուրդը կխելռի, բդի անգիտակից մադ եղնիս, որ չհասկնաս, ինչ տեղի կունենա: Մուսըռնի յաշիկներից նույնիսկ զիբիլ կտանին»:

Տիգրան Պետրոսյան, դասախոս.«Գազի գների թանկացումը Հայաստանում կբերի շատ ավելի վատ տնտեսական վիճակի: Թե ինչու է գազը Վրաստանում ավելի էժանացել, ըստ երեւույթին, իրենք ավելի շատ գազը ներկրում են Ադրբեջանից եւ ունեն ստրատեգիական համագործակցության ծրագիր միմյանց հետ: Տրանզիտը դեպի Վրաստան շատ ավելի էժան է, քան տրանզիտը դեպի Հայաստան: Վրաստանում բնակչության հանդեպ պետական հոգածությունը շատ ավելի մեծ է: Եթե էնտեղ 1 խմ գազը 110 դրամով է վաճառվում, մեր կառավարության եւ ստրատեգիական դաշնակցի շնորհիվ 1 խմ գազը այս պահին 132 դրամով ենք գնում, դա խոսում է այն մասին, որ Վրաստանը ստրատեգիական առումով ճիշտ արտաքին քաղաքականություն է վարում: Եթե 30 տոկոս սուբսիդավորումն էլ մեր խնայողությունների հաշվին է լինելու, էական փոփոխություն չի լինի: Մի տարի կսուբսիդավորվի, մյուս տարի՝ ոչ»:

Անահիտ Սիմոնյան

________________________________

Բաժանորդագրություն.

Եթե կկամենաք բաժանորդագրվել, պարզապես զանգահարեք (0312) 50622, ձեզ կայցելի գործակալը:

Նյու Վասյուկիի հանգույն

info — Mon, 20 May 2013 14:07:07 +0000

Այսօր ԱԺ-ում մեկնարկած քառօրյայի առաջին նիստում վարչապետ Տիգրան Սարգսյանը ներկայացրել է կառավարության նոր ծրագիրը:

Սա Տիգրան Սարգսյանի հերթական հեքիաթաբանությունն է, համահունչ Գյումրին Նյու Վասյուկի սարքելու ծրագրի երազախաբությանը, երբ տարիներ շարունակ թմբկահարում էր Գյումրու Տեխնոպարկի, քաղաքը արդյունաբերական կենտրոն դարձնելու մասին, սական վերջում, ըստ էության, սառույցի վրա գրեցին այդ ծրագիրը՝ դա մատուցելով իբր անվան, նպատակների, թիրախային խմբերի փոփոխություն, մի խոսքով ծրագրի ձախողումը ներկայացվեց նմանակերպ փաթեթավորմամբ …

Հիմա էլ վարչապետը, ներկայացնելով կառավարության ծրագիրը՝ գլուխ է գովում, թե վերջին քսան տարիներին այսքան կոնկրետ ծրագիր կառավարությունը չի ներկայացրել ԱԺ։ «Մենք պատմության մեջ առաջին անգամ առարկայական ծրագիր ենք ներկայացրել, հստակ ժամանակացույցով, ֆիքսել պետության եւ մասնավոր հատվածի անելիքը, այսպիսի պրակտիկա երբեւիցե չի եղել»,-հայտարարել է Տիգրան Սարգսյանը՝ նշելով, որ իրենք հատկապես կարեւորել են թիրախային երեք խնդիրներ՝ գործազրկություն, արտագաղթ եւ աղքատություն։

Հետաքրքիր է, որ սա ասվում է հանրապետության տարբեր շրջաններում առաջացող բողոքի ակցիաների ու ըմբոստության օջախների առկայության համապատկերում, որոնք հիմքում ունեն հենց սոցիալական խնդիրները՝ համատարած եւ օրեցօր ավելացող աղքատություն, գործազրկություն, գների բարձրացում, ընտանիք պահել չկարողանալու ու երկիրը լքելու մարդկանց ցանկություն…

Կառավարության նախորդ ծրագրում, ամենամյա պետական բյուջեի նախագծերում վարչապետը էլի առաջնային էր համարում այդ խնդիրները, թմկահարում բյուջեի սոցիալական ուղղվածության մասին, բայց տարեցտարի այդ առումով վիճակը ոչ միայն չի բարելավվում, այլ գնալով վատանում է…

Վարչապետը նշել է նաեւ, որ այս տարվա հուլիսի 1-ից կառավարությունը նվազագույն աշխատավարձը կբարձրացնի. «Նվազագույն աշխատավարձն այսօր 35.000 դրամ է, եւ մենք մտադիր ենք այս ցուցանիշը էապես բարձրացնել: Մենք նախատեսում ենք հուլիսի 1-ից մինիմալ աշխատավարձը 35 000 դրամից դարձնել 45 000 դրամ»,- հայտարարել է Տիգրան Սարգսյանը:

Սա, թերեւս, կապված է գների եւ այլ ապրանքների գների հնարավոր բարձրացման հետ: Հավանաբար սա նկատի ունի վարչապետը փոխհատուցման մասին խոսելիս: Բայց փորձը ցույց է տալիս, որ աշխատավարձի, թոշակի եւ նպաստի բարձրացումները երբեւէ չեն փակել այն «ծակերը» որոնք առաջացել են հերթական գնաճի հետեւանքով:

Կառավարությունը մշտապես խոստումներ է տալիս, մեծ-մեծ խոսքեր շռայլում, բայց արդյունքում այդ խոստումները կամ հնչում են զուտ եթերային նպատակների համար՝ մարդկանց աչքերին թոզ փչելու միտումով, կամ էլ, լավագույն դեպքում, մնում են թղթի վրա…

Հիմա էլ «աննախադեպ», «պատմության մեջ չտեսնված-չլսված» ծրագիր են մշակել. աննախադեպ ինչո՞վ՝ գլուխգովանությա՞մբ, դատարկ խոստումներո՞վ, հերթական հեքիաթներո՞վ՝ Նյու Վասյուկիի հանգույն…

Համլետ Կիրակոսյան

Լուսանկարը՝ slaq. am-ի

________________________________

Բաժանորդագրություն.

Եթե կկամենաք բաժանորդագրվել, պարզապես զանգահարեք (0312) 50622, ձեզ կայցելի գործակալը:

Թանգարանային տոն՝ տարաբնույթ միջոցառումներով

info — Mon, 20 May 2013 13:53:56 +0000

Տարաբնույթ միջոցառումներ, այցելուների աննախադեպ մեծ թվաքանակ ու բաց թանգարաններ մինչեւ կեսգիշեր: Ավանդույթ դարձած սկզբունքով՝ արդեն 8-րդ տարին Հայաստաննում մայիսյան տոները համալրվել են եւս մեկով՝ թանգարանային գիշերներով: Մայիսի 18-ի մշակութային տոնը նաեւ հանրապետության երկրորդ քաղաքում էր՝ «Թանգարանային գիշերներ» միջոցառման ու թանգարանների միջազգային օրվա համընկնումով:

Հ.Շիրազի տուն-թանգարանում՝ վլադիլենբալյանական հյուրընկալություն, Ավ.Իսահակյանի թանգարանում՝ ուսանողական գեղանկարչական աշխատանքների ցուցադրությամբ ու «Շիրակի մեծ վարպետներ» միջոցառմամբ, Մհեր Մկրտչյանում՝ կինո ու թատրոն իրար խառնած, Ասլամազյաններում՝ անհատական ցուցահանդես՝ տարբեր միջոցառումների զուգակցմամբ, իսկ Ձիթողցյաններում՝ հացաթխություն ու գյումրիական տարազների ցուցադրություն: Թանգարանների ու նրանցում կազմակերպված միջոցառումների ոչ ամբողջական պատկերն է, սակայն մշակութային տոնն ու աշխուժությունը նկատելի էր բոլոր մշակութային օջախներում:

Ֆրունզիկ Մկրտչյանի թնագարանը առավոտից ամենատարբեր տարիքի բազմաթիվ այցելուներ է ընդունել: «Մեր մանկության տանգոն» դիտելու են շտապել ոչ միայն հայ, այլեւ ռուս հանդիսատեսը: Ապա դերասանի հարկի տակ մոնոներկայացում էր՝ ինքնասպանության փորձից ազատվելու գաղափարով.«Ներկայացումը համապատասխանում է Մհերի հոգեկան, հուզական աշխարհին, միայ այն տարբերակով, որ մենք շարունակում ենք կյանքի արեւոտ կողմը ներկայացնլ»,- ասում է թանգարանի տնօրեն Շողիկ Մելքոնյանը:

Հովհննես Շրազի տուն-թանգարանում Վլադիլեն Բալյանի 60-ամյակին նվիրված գրական-ստեղծագործական միջոցառմանը ներկա էին մարզային ու քաղաքայի իշխանությունների ներկայացուցիչները: Քաղաքպետ Ս.Բալասանյանը, անդրադառնալով Շիրազի բառերով ու կոմպոզիտորի երաժշտությամբ գրված «Գյումրի-Լենինական» երգին, ցանկություն հայտնեց, որ այն Գյումրի քաղաքի հիմնը դառնա, եւ ամենայն հավանականությամբ առաջիկայում այս թեմայով հանրային քննարակում կկազմակերպվի:

-Մենք նոր նախագծեր ունենք, որ կարողանանք Գյումրու թանգարանները իսկապես վերածել վայրերի, որտեղ այցելուները մղումով գան, ոչ թե փոշոտվող թանգարաններ ունենանք՝ քիչ այցելուներով, որովհետեւ մեր թանգարանների մեծ մասը մեկ անգամ տեսնելուց հետո կրկնապատիկ այցելելու ցանկություն չի առաջանում,- նշեց քաղաքապետարանի մշակույթի բաժնի պետ Արտաշես Կարապետյանը՝ ավելացնելով, որ կան նոր մտահղացումներ, եվրոպական նոր նախագծեր, որոնք իրականացնելու դեպքում այդ թանգարանների այցելուների թիվը զգալի կմեծանա:

-Նմանատիպ միջոցառումները միշտ էլ մի դրական քայլ է մշակույթի ճանաչման, ժողովրդականացման, ժողովրդին մշակույթին կապելու գործում: Ինչքան շատ մշակութային միջոցառումներ՝ այդքան մշակույթի զարգացում,- նկատեց քանդակագործ Արտուշ Պապոյանը:

Քաղաքի 6 թանգարանները, տարբնույթ միջոցառումներով, մինչեւ ուշ գիշեր բաց էին այցելուների առաջ:

Մարինե Պետրոսյան

________________________________

Բաժանորդագրություն.

Եթե կկամենաք բաժանորդագրվել, պարզապես զանգահարեք (0312) 50622, ձեզ կայցելի գործակալը:

Ցուցահանդես Վահրամաբերդ գյուղում

info — Mon, 20 May 2013 13:16:15 +0000

Արդեն 2 տարի է Վահրամաբերդում գյուղի դպրոցում գործող մանրանկարչության, կերպարվեստի ստուդիա հաճախող 16 երեխաների թվով 20 նկարներ ցուցադրվեցին մայիսի 19-ին կազմակերպված ցուցահանդեսին: Նկարչական խմբակը բացվել է World Vision կազմակերպության իրականացրած սոցիալական ծառայություն ծրագրով, որում ի սկզբանե որոշված է եղել հոգեւորականների ընդգրկումը: Մարմաշենի հովվության հոգեւոր հովիվ Տեր Հակոբ քահանա Գրիգորյանի մեկնաբանմամբ՝ հոգեւորականի ընդգրկումը այս ծրագրում, միտում ունի ժողովրդի համար հստակեցնելու այն, որ հոգեւորականը միայն աղոթող անձ չէ, այլ համայնքի կարիքների համար ունի մտահոգություն: Տեր Հակոբ քահանա Գրիգորյանը նշում է, որ գյուղում երեխաների համար հետաքրքրություններ եւ զբաղմունք չկա, բացառությամբ նկարչական եւ վեջերս ձեւավորված պարի խմբակի. «Հասկանալի է, բոլորից չենք ակնկալում, որ վաղը նկարիչներ կդառնան, բայց գույնի զգացողությունը, ճաշակ ձեւավորելը շատ մասնագիտություններում պետք կգա»:

Մանրանկարչության, կերպարվեստի ստուդիայի ղեկավար Վարդեւան Շամամյանը նշեց, որ ներկայացված են 7-11 տարեկան երեխաների աշխատանքներ.«Ցուցահանդեսը ներկայացված է երկու թեատիկայով՝ հայկական միջնադարյան հոգեւոր արվեստի մանրանկարչություն եւ կերպարվեստ: Երեխաների մեջ տաղանդավորներ շատ կան, չնայած նրան, որ շրջապատի մեջ վախ կար, որ գյուղի երեխաները մի քիչ հակված չեն արվեստին, ստեղծագործելուն»,-ավելացրեց Վ.Շամամյանը:

Նկարչական խմբակ հաճախող 11-ամյա Աիդա Սահակյանը միշտ ցանկացել հաճախել նկարչության: Խմբակի բացման օրվանից խմբակ հաճախելը եղել է միայն ու միայն իր ցանկությամբ: Այսօր էլ, յուրաքանչյուր անգամ պարապմունքի հաճախելը, նրա համար շարունակում է մնալ տոն:

Ս.Առաքելյան

________________________________

Բաժանորդագրություն.

Եթե կկամենաք բաժանորդագրվել, պարզապես զանգահարեք (0312) 50622, ձեզ կայցելի գործակալը:

Զինվոր բանակ չեն ուղարկում անշունչ դի ստանալու համար

info — Mon, 20 May 2013 13:02:56 +0000

Մայիսի 15-ին՝ ժամը 15:30-ի սահմաններում, Նոյեմբերյանում գտնվող ՊՆ N զորամասում ծառայակցի արձակած գնդակից զոհվել էր Մարտունիի Վերին Գետաշեն գյուղի բնակիչ, 1994թ. ծնված զինծառայող Լյուքս Ստեփանյանը: Գյուղապետի խոսքով՝ Լյուքսը գյուղի լավագույն երիտասարդներից էր. «Նա երեք տարի շարունակ սովորել է «Քվանտ» վարժարանում, բարձր առաջադիմությամբ: Այս ընթացքում նա գոհ էր իր զինծառայությունից եւ որպես լավագույն զինծառայող՝ պատրաստվում էին պատվոգիր ուղարկել»,- ասել է գյուղապետը լրագրողներին:

Սպանությունը կատարել է նույն զորամասի պահակախմբի մուտքի դիտորդ, շարքային Դավիթ Ռաֆայելի Խաչատրյանը՝ իրեն ամրակցված ԱՄԿ տեսակի հրաձիգից: Կրակոցից նույն զորամասի ծառայող Հրաչյա Վաղինակի Սարգսյանը գլխի շրջանում ստացել է հրազենային վիրավորում եւ տեղափոխվել ՀՀ ՊՆ կենտրոնական կլինիկական զինվորական հոսպիտալի վերակենդանացման բաժանմունք: Որոշում է կայացվել Դավիթ Խաչատրյանին ՀՀ քր. օր-ի 104 հոդվածի 2-րդ մասի 6-րդ կետով եւ ՀՀ քր. օր-ի 112 հոդվածի 1-ին մասով որպես մեղադրյալ ներգրավելու մասին, ինչպես նաեւ նրա նկատմամբ կալանավորումը որպես խափանման միջոց ընտրելու միջնորդություն դատարան ներկայացնելու մասին: Փաստի առթիվ ՀՀ ՊՆ քննչական ծառայությունում ՀՀ քր. օր-ի 104 հոդվածի 2-րդ մասի 6-րդ կետով ¥սպանությունը՝ շատերի կյանքի համար վտանգավոր եղանակով¤ հարուցվել է քրեական գործ, կատարվում է նախաքննություն:

Սպանված զինվոր Լյուքս Ստեփանյանի հայրը մայիսի 17-ին որոշել էր ի նշան բողոքի՝ որդու դին դագաղով բերել Երեւան եւ բողոքի միջոցառում անցկացնել Կառավարության շենքի դիմաց: Լրագրողների հետ զրույցում ծնողները նշել են, որ իրենց զայրույթի առիթն այն է, որ իրենք տեղեկություններ ունեն՝ իրենց որդին միջադեպում մեղք չի ունեցել. «Սեյրան Օհանյանից պահանջում ենք պատասխանատվության ենթարկել մարդասպանին: Սա դիտավորյալ սպանություն է»:

Սեւան-Երեւանի ճանապարհին, զինվորի դին տեղափոխող գյուղացիները հանդիպել են ՊՆ մեքենաներին, ինչպես նաեւ ոստիկանության պատնեշին, ովքեր թույլ չեն տվել նրանց անցնել առաջ: Տեղի է ունեցել բախում, զինվորի հարազատների եւ ոստիկանների միջեւ հրմշտոց է սկսվել: Դեպքի վայր են շտապել ՀՀ ոստիկանապետ Վլադիմիր Գասպարյանն ու պաշտպանության նախարար Սեյրան Օհանյանը, ովքեր հարազատների հետ երկար բանակցություններից հետո կարողացել են համոզել Լյուքսի ծնողներին վերադառնալ գյուղ եւ հողին հանձնել զինվորի դին՝ խոստանալով գործին համապատասխան լուծում տալ: Զոհված զինվորի եղբայրը հարց է ուղղել Սեյրան Օհանյանին, թե դա դիտավորյալ սպանություն է: «Այո՜, սակայն նախաքննությունը ամեն ինչ ցույց կտա»,- պատասխանել է նախարարը ու լրագրողների եւ զոհվածի հարազատների ներկայությամբ խոստացել շատ արագ նախաքննություն իրականացնել, մեղավորներին պատժել՝ այդ մասին հրապարակավ հայտնելով հանրությանը: Լյուքսի մայրն էլ Սեյրան Օհանյանին ասել է, որ «մինչեւ մի քանիսին չգնդակահարեք, հարցի լուծում չի լինի»:

Զինվորի հուղարկավորությունից հետո մամուլը հեղեղվեց մեկնաբանություններով, որոնք պարզաբանում էին տղայի դիակը Երեւան բերելու շարժառիթները, հոր կտրուկ որոշման պատճառները: Ըստ որոշ հրապարակումների՝ ծնողներին այդ քայլին հրահրել են իրավապաշտպան որոշ կազմակերպությունների ներկայացուցիչներ. մասնավորապես մատնանշվում էին իրավապաշտպան Ժաննա Ալեքսանյանի եւ ՀՔԱ վանաձորյան գրասենյակի տնօրեն Արթուր Սաքունցի անունները: Վերջինս HayNews.am-ի թղթակցին տված հարցազրույցում նշել է. «Ես երեկ ամբողջ օրը եղել եմ Ժաննա Ալեքսանյանի հետ, եւ մենք Վանաձորում ենք գտնվել, սպանված զինվորների հետ հանդիպում չի եղել: Իսկ ով դա ասում ա, թող ինքն էլ ասի, թե որտեղից է նման ինֆորմացիա վերցնում: Դա ակնհայտ ապատեղեկատվություն է, որի նպատակն է ողջ պատասխանատվությունը ՊՆ ղեկավարությունից շեղել բոլորովին այլ ուղղությամբ եւ քավության նոխազներ գտնել, որը չի ստացվի»,- նշել է Արթուր Սաքունցը:

Իրավապաշտպան Ժաննա Ալեքսանյանն էլ իր հերթին պարզաբանել է. «Ես այդ գյուղ չեմ այցելել, եւ դա ինձ հետ ընդհանրապես առնչություն չունի: Ես կարծում եմ, որ իմ անվան շուրջ շահարկումներ են սկսվում»:

ԱԺ նախկին պատգամավոր Ստյոպա Սաֆարյանը, անդրադառնալով այդ հարցին, ֆեյսբուքյան իր էջում գրել է. «Լսե՜ք, ստրկամիտներ, պատվեր կատարողներ: Ինձ չի հետաքրքրում, թե ով է հղացել կամ հուշել այդ միտքը: Այն չափազանց ադեկվատ է իրավիճակին, որի ստեղծողն այս իշխանություններն են իրենց հանցավոր անգործությամբ: Այդ բոսյակային վայրահաչն ու վայնասունը նաեւ անեիք այն ժամանակ, երբ ՊՆ ղեկավարության գիտությամբ զինվորները բազմակի քվեարկության էին տարվում, երբ զինվորը ցույցերի ժամանակ հանվում էր սեփական ծնողի դեմ` կրակելու պատրաստ, երբ զինվորի համար բյուջետային հատկացումները մսխվում էին գայլերի կողմից, երբ բազմաթիվ զինվորների սպանություններ «չբացահայտված» ու անպատիժ մնացին: Ո՞ւր էիք, ողորմելիներ: Ինչո՞ւ կարելի է ձեր հղփացած լակոտների հարսանյաց շքախմբերը պտտացնեք Հանրապետության հրապարակում ու փողոցներում, իսկ սպանված զինվորի դին այնտեղ հասցնելը շոու՞ դարձավ: Ծնողը բանակին առողջ զավակ է տվել եւ նրա տուն առողջ զավակ պետք է գնա: Կառավարության մեղքով են սպանությունները շարունակվում բանակում, հետեւաբար, այո՜, երիտասարդի դիակը կարող էր բերվել եւ դրվել կառավարության դեմը: Ինչի՞ց եք ամաչում… Միթե՞ դուք ամոթ ունեք»:

Ավելի ուշ ՀՔԱ վանաձորյան գրասենյակի տնօրեն Արթուր Սաքունցն իր ֆեյսբուքյան էջում գրեց. «Տասերկու օրվա ընթացքում երեք զինվոր, երեք մարդ, երեք երիտասարդ մահացան.. կորցրեցինք… Եւ այսքանից հետո, ո՞վ ասեց, ու՞մ ասեց, ի՞նչ ասեց: Տո բա մա՞րդ ենք մենք, բա մենք իրավու՞նք ունենք մարդ կոչվելու, մարդաերես դուրս գալու: Պզուկ, հոսանք… տո պզուկն էլ եք Դուք, հոսանքն էլ եք Դուք: Ամոթ, Նամուս, Աբուռ ասածը ծանո՞թ է: Մարդկանց արեւածաղկի սերմի նման չրթում եք, ինչքան է պետք, որ հագենաք, ասեք էլի, իմանանք…Հրադադարի խախտման հազարավոր դեպքերից մահանում են տասից մեկը-երկուսը… Հիմա որտե՞ղ է ապահով՝ զինված ուժերի ներսու՞մ, թե՞ բաժանարար գծում: Հիմա հակառակորդը որտե՞ղ է, չեմ հասկանում. սահմանի մյուս կողմու՞մ, թե՞ սահմանից այս կողմ: Հաշվետու, վստահություն… դրանցով կյանքերը վերականգնվելու՞ են, մահերը դադարելու՞ են»:

Իսկ զինվորի մայրն իր որդուն հրաժեշտ տալիս ասել է.«Գոնե թշնամու գյուլլից զոհվեր, իմանայի հերոս մեռավ», իսկ հիմա ի՞նչ՝ հայը հայի վրա է զենք բարձրացրել:

Հրաչ Հովհաննիսյան

________________________________

Բաժանորդագրություն.

Եթե կկամենաք բաժանորդագրվել, պարզապես զանգահարեք (0312) 50622, ձեզ կայցելի գործակալը:

Պարգեւներ շիրակցի հաղթողներին. «Վերածնունդ»-ն ամփոփեց մարզի հաղթանակները

info — Mon, 20 May 2013 12:05:51 +0000

Շիրակի մարզի մասնակցությունը երաժիշտ կատարողների «Վերածնունդ» միջազգային փառատոնին մշտապես մեծաքանակ եւ բազմամրցանակ է եղել: Բացառություն չէր նաեւ 2013 թվականը:

Գյումրու, Արթիկի, Ազատանի, Ամասիայի, Ախուրյանի եւ Արեւիկի համայքների թվով 18 երաժշտական հաստատություններից փառատոնին մասնակցել է շուրջ 200 անհատ կատարող եւ 5 երգչախումբ: Մասնակիցներից 21-ը երաժշտական դժվարին պայքարում զբաղեցրել են առաջին, 19-ը՝ երկրորդ եւ 28-ը՝ երրորդ տեղերը՝ արժանանալով համապատասխանաբար ոսկե, արծաթե, բրոնզե մեդալների, միջազգային փառատոնի առաջին, երկրորդ եւ երրորդ կարգի դիպլոմների եւ հաղթողի դափնեկրի կոչման: Բազմաթիվ մասնակիցներ արժանացել են տարբեր դիպլոմների եւ մրցանակների:

Մայիսի 18-ին Գյումրու արվեստների ակադեմիայի դահլիճում հանդիսավոր պայմաններում պարգեւատրվեցին շիրակցի ոսկե մեդալակիրները, մյուս մրցանակները հանձվեցին տնօրեններին՝ տեղերում մասնակիցներին հանձնելու համար: Ի դեպ, այս տարի առաջին անգամ փառատոնի հաղթողներին պարգեւներն ու պատվոգրերը կտրվեն մարզկենտրոններում: Կազմակերպիչների խոսքերով, այս կերպ քաղաքային եւ մարզային իշխանությունները տեղյակ կլինեն իրենց մարզը ներկայացնող մասնակիցների ցուցաբերած արդյունքներին:

Երաժիշտ-կատարողների «Վերածնունդ» միջազգային 5-րդ մրցույթ փառատոնի ավարտից մեկ ամիս անց՝ կազմակերպիչները չմոռացան շնորհակալություններ հայտնել ու փոխադարձաբար ընդունել՝ երաժշտամշակութային տոնը պատշաճ կերպով կազմակերպելու եւ անցկացնելու համար:

Գյումրու քաղաքապետ Սամվել Բալասանյանի անունից փառատոնի կազմակերպչական աշխատանքներին գործուն մասնակցության համար պատվոգրերի, շնորհակալագրերի, եւ դրամական պարգեւների արժանացան փառատոնի կազմկոմիտեի անդամները: Քաղաքապետի կողմից Երեւանի պետական կոնսերվատորիայի Գյումրու մասնաճյուղը նվեր ստացավ նաեւ մեկ համակարգիչ:

Շիրակի փոխմարզպետը՝ մարզի ղեկավարի անունից կարեւորելով մրցույթի անցկացման գործում հովանավորների դերը՝ բոլոր հովանավորներին պարգեւտրեց Շիրակի մարզպետի պատվոգրերով: Իր հերթին մարդկային ռեսուրսների զարգացման ՙՓյունիկ՚ համահայկական հիմնադրամը պատվոգրեր շնորհեց մարզպետ Ֆելիքս Ցոլակյանին ու քաղաքապետ Սամվել Բալասանյանին՝ փառատոնի անցկացմանն աջակցելու համար:

Կազմակերպիչները չմոռացան նաեւ փոքր քաղաքի մեծ փառատոնը լուսաբանած լրագրողներին՝ հանձնելով նրանց շնորհակալագեր եւ աշխարհահռչակ ջութակահար Ժան Տեր-Մերկերյանի ցանկությամբ՝ հեղինակի երաժշտական սկավառակը: Մարզային լրատվամիջոցների մեջ շնորհակալագիր տրվեց նաեւ «Գյումրի-Ասպարեզ» («Ասպարեզ») օրաթերթի լրագրողին՝ փառատոնի ողջ ընթացքը՝ մեկնարկից մինչեւ պարգեւների հանձնում լուսաբանելու համար: Օրաթերթը երաժշտամշակութային բազամազանությունը ներկայացրել է իր հերոսների դիմանկարներով, սկսնակից մինչեւ պրոֆեսիոնալ երաժիշտների հետ հարցազրույցներով: «Վերածնունդ»-ի 10-օրյակի գրեթե բոլոր օրերին թերթում տպվել են հոդվածներ՝ փառատոնային կյանքի օրվա անցուդարձով:

-Այս յոթ տարիների ընթացքում եղել են հարյուրավոր հրապարակումներ, եւ զարմանալիորեն ոչ մի տող, ոչ մի բացասական բառ փառատոնի հասցեին չի նշվել: Սա նույնպես մեր ձեռքերումն է: Սա նաեւ մեր ԶԼՄ-ների ներկայացուցիչների վերաբերմունքն է իրենց քաղաքի, մշակույթի եւ ընդհանրապես փառատոնի նկատմամբ: Շնորհակալություն դրա համար,-իր խոսքում նշեց փառատոնի փոխնագահ Աշոտ Պետրոսյանը:

Մրցույթի կազմակերպիչները ՀՀ մյուս մարզերում կլինեն առաջիկա օրերի ընթացքում:

Լիլիթ Թովմասյան

________________________________

Բաժանորդագրություն.

Եթե կկամենաք բաժանորդագրվել, պարզապես զանգահարեք (0312) 50622, ձեզ կայցելի գործակալը:

«Թանգարանային գիշերն» ու համայնքային թանգարանների ծառայության որակը

info — Mon, 20 May 2013 11:57:25 +0000

Գյումրիում հերթական անգամ միջազգային օրվան թարմություն բերելու մեծ փորձերով սկսվեց ու ավարտվեց «Թանգարանայի գիշեր» միջոցառումների շարքը: Ամեն տարի հարյուրավոր կամ հազարավոր այցելուների թվերի մասին բարձրաձայնելուց բացի, թանգարաններում հիմնախնդիրների մասին, չգիտես ինչու, պաշտոնյաները փորձում են լռել: Այնինչ, հատկապես այդ օրերին ավելի քան ակնառու են համայնքային թանգարանների հիմնախնդիրները:

Անդրադառնանք դրանցից միայն մեկին: Հետաքրքիր է՝ ի՞նչ է կատարվում, երբ համայնքային թանգարան է այցելում անգլալեզու զբոսաշրջիկը՝ առանց թարգմանչի: Երեւի մի քանի լուսանկարներ է անում ու հեռանում, կամ ասենք, լավագույն դեպքում, անգլերենին փոքր-ինչ տիրապետող աշխատակիցն է ընդառաջ գալիս:

Համայնքային թանգարանները զրկված են օտարալեզու էքսկուրսավարների առանձին հաստիքներից: Թանգարանի տնօրենը, հավանաբար, էքսկուրսավար ընտրելիս, պետք է հաշվի առնի վերջինիս լեզուների իմացությունը: 2-ը մեկում` (հայերեն, ռուսերեն), լավագույն դեպքում՝ 3-ը մեկում (հայերեն, ռուսերեն, անգլերեն) ու հարցը լուծված կլինի:

Որքան էլ էքսկուրսավարը տիրապետի օտար լեզուների, համենայնդեպս, չի կարող ներկայացնել թանգարանի պատմությունն այնպես, ինչպես կկարողանա դա անել օտարալեզու մասնագետը:

Եթե անգամ էքսկուրսավարը տիրապետում էլ է որեւէ օտար լեզվի, դա չի նշանակում, որ պարտավորվում է զբոսաշրջիկին այդ լեզվով ներկայանալ: Հատկապես այն դեպքում, երբ նույն քաղաքում գործող մշակույթի նախարարության Մերկուրովի անվան տուն-թանգարանը, Ժողովրդական ճարտարապետության եւ քաղաքային կենցաղի թանագարանն ունեն այդ հաստիքները: Օրինակ, 2 թանգարանները միասին ունեն մեկական ռուսալեզու, ֆրանսալեզու եւ 3 անգլալեզու մասնագետ էքսկուրսավարներ:

Ի՞նչ են մտածում այս մասին, ասենք, քաղաքապետարանի համապատասխան բաժինը, ավագանու անդամները, իսկ գուցե դեռ չգիտե՞ն, որ նման խնդիր կա: Համայնքը չի՞ կարծում արդյոք, որ նման հաստիքներ ստեղծելը եւ աշխատակիցներ ընդունելը հիմա ավելի քան կարեւոր է: Մեկ ամիս անց ԱՊՀ մշակութային մայրաքաղաք ճանաչված Գյումրին կունենա բազմաթիվ զբոսաշրջիկներ, իսկ վերջիններիս համար թանգարանները պիտի դառնան քաղաքի պատմության էջերը:

Տպավորություն է նաեւ, որ այս խնդրին ծանոթ քաղաքապետարանը հույսը, հավանաբար, դրել է զբոսաշրջիկներին ուղեկցող թարգմանիչների վրա եւ, երեւի, կարող է պատճառաբանել, թե հաստիքներ բացելու համար քաղաքի բյուջեն թույլ չի տալիս: Այս դեպքում կարելի է համեմատել՝ համայնքը գումար կարող է ներդնել կենտրոնական հրապարակի շատրվանները երգող դարձնելու համար, այն դեպքում, երբ զբոսաշրջիկն այդ երգող շատրվանները կարող է տեսնել նաեւ Գյումրուց դուրս, բայց Գյումրուց դուրս հաստատ չի կարող ունենալ Ֆրունզիկ Մկրտչյանի, Հովհ.Շիրազի, Ավ.Իսահակյանի, Մարիամ եւ Երանուհի Ասլամազյանների կյանքի, արվեստի ու նրանց թողած ժառանգության մասին օտար լեզվով հաղորդակցվելու հնարավորությունը:

Անի Մկրտչյան

________________________________

Բաժանորդագրություն.

Եթե կկամենաք բաժանորդագրվել, պարզապես զանգահարեք (0312) 50622, ձեզ կայցելի գործակալը: